गुरुवार, जुलाई 01, 2010

आज म्हारी मायड भाषा रा दूहा

 म्हारी मायड भाषा रा दूहा              
                    राजस्थानी भाषा




राज बणाया राजव्यां,भाषा थरपी ज्यान ।
बिन भाषा रै भायला,क्यां रो राजस्थान ॥१॥

रोटी-बेटी आपणी,भाषा अर बोवार ।
राजस्थानी है भाई,आडो क्यूं दरबार ॥२॥

राजस्थानी रै साथ में,जनम मरण रो सीर ।
बिन भाषा रै भायला,कुत्तिया खावै खीर ।।३॥

 पंचायत तो मोकळी,पंच बैठिया मून ।
बिन भाषा रै भायला,च्यारूं कूंटां सून ॥४॥

भलो बणायो बाप जी,गूंगो राजस्थान ।
बिन भाषा रै प्रांत तो,बिन देवळ रो थान॥५॥

आजादी रै बाद सूं,मून है राजस्थान ।
अपरोगी भाषा अठै,कूकर खुलै जुबान ॥६॥

राजस्थान सिरमोड है,मायड भाषा मान ।
दोनां माथै गरब है,दोनां साथै शान ॥७॥

बाजर पाकै खेत में,भाषा पाकै हेत ।
दोनां रै छूट्यां पछै,हाथां आवै रेत ॥८॥

निज भाषा सूं हेत नीं,पर भाषा सूं हेत ।
जग में हांसी होयसी,सिर में पड्सी रेत ॥९॥

निज री भाषा होंवतां,पर भाषा सूं प्रीत ।
ऐडै कुळघातियां रो ,जग में कुण सो मीत ॥१०॥

घर दफ़्तर अर बारनै,निज भाषा ई बोल ।
मायड भाषा रै बिना,डांगर जितनो मोल ॥११॥

मायड भाषा नीं तजै,डांगर-पंछी-कीट ।
माणस भाषा क्यूं तजै, इतरा क्यूं है ढीट ॥१२॥

मायड भाषा रै बिना,देस हुवै परदेस ।
आप तो अबोला फ़िरै,दूजा खोसै केस ॥१३॥

भाषा निज री बोलियो,पर भाषा नै छोड ।
पर भाषा बोलै जका,बै पाखंडी मोड ॥१४॥

मायड भाषा भली घणी, ज्यूं व्है मीठी खांड ।
पर भाषा नै बोलता,जाबक दीखै भांड ॥१५॥

जिण धरती पर बास है,भाषा उण री बोल ।
भाषा साथ मान है , भाषा लारै मोल ॥१६॥

मायड भाषा बेलियो,निज रो है सनमान ।
पर भाषा नै बोल कर,क्यूं गमाओ शान ॥१७॥

राजस्थानी भाषा नै,जितरो मिलसी मान ।
आन-बान अर शान सूं,निखरसी राजस्थान ॥१८॥

धन कमायां नीं मिलै,बो सांचो सनमान ।
मायड भाषा रै बिना,लूंठा खोसै कान ॥१९॥

म्हे तो भाया मांगस्यां,सणै मान सनमान ।
राजस्थानी भाषा में,हसतो-बसतो रजथान ॥२०॥

निज भाषा नै छोड कर,पर भाषा अपणाय ।
ऐडै पूतां नै देख ,मायड भौम लजाय ॥२१॥

भाषा आपणी शान है,भाषा ही है मान ।
भाषा रै ई कारणै,बोलां राजस्थान ॥२२॥

मायड भाषा मोवणी,ज्यूं मोत्यां रो हार ।
बिन भाषा रै भायला,सूनो लागै थार ॥२३॥

जिण धरती पर जळमियो,भाषा उण री बोल ।
मायड भाषा छोड कर, मती गमाओ  डोळ ॥२४॥

हिन्दी म्हारो काळजियो,राजस्थानी स ज्यान ।
आं दोन्यूं भाषा बिना,रै’सी कठै पिछाण ॥२५॥

राजस्थानी भाषा है,राजस्थान रै साथ ।
पेट आपणा नीं पळै,पर भाषा रै हाथ ॥२६॥

7 टिप्‍पणियां:

  1. हुकम रचना जोरदार लागी अर बांच बांच नै फेर बांची. आखी रचना मांय २५मो दूहो थोड़ौ अटपटौ लखावै.

    आप हर जागा परभासा रै हेत नै छोड़ण री बात करी छै पण इण दूहा मांय आवता ईं बात उल्टी पड़ जावै. इणनै संभाळौ.

    उत्तर देंहटाएं
  2. लखदाद हुकम... आपरै २५ दूहा अगर राजस्थानीयां रै दिमाग मांय उतर जावै तौ राजस्थान रौ सोयोड़ौ मान-सम्मान पाछौ आ जावै.

    जै राजस्थानी सा!

    उत्तर देंहटाएं
  3. आपरा सगळा दूहा घणा सांतरा ...मायड़ रो मान बधावण सारु मोकळी बधायाँ आपनै .

    उत्तर देंहटाएं
  4. Shree omji

    aapki kawirts seedhe dil me utar gayi
    jitni tareef kee jaye kam hai
    marwadi ke prati aapke lagaav aur aapke prayaason ko salaam karta hun

    saath hi saath ek choti si gustaakhi ke liye maafi chahta hun.aapki kawita dekh kar ise apne blog par daalne ka lobh nahi chood paaya, aapke naam ke saath hi ise apne blog par publish kiyaa hai bina aapki ijajat ke aapki kawita apne blog par daalne ke liye aapse maafi chahta hun.agar aapko bura lage to main apne blog se hataa dungaa. Gustakkhi ke liye fir kshamaa prarthee hun

    www.aapnofatehpur.blogspot.com

    उत्तर देंहटाएं